Monday, September 9, 2013

കവിതകള്‍

ഓര്‍ക്കേണ്ടതായിരുന്നു 

പ്രണയത്തിന്റെ പാരമ്യത്തിലും 
പകല്‍ മാന്യതയ്ക്ക് വേണ്ടി 
അവളെ ഉപേക്ഷിക്കുമ്പോള്‍ 
നീ ഓര്‍ക്കണമായിരുന്നു 
നിന്‍റെ യാഗാശ്വത്തെ പിടിച്ചുകെട്ടാനുള്ള 
ബലം അവള്‍ എന്നെങ്കിലും നേടുമെന്ന് 

സ്വന്തമാക്കിയവളെ പങ്കുവെയ്ക്കപ്പെടുമ്പോള്‍ 
മൌനം നുണഞ്ഞു കൊണ്ടിരുന്ന
നീ ഓര്‍ക്കേണ്ടതായിരുന്നു
നിന്‍റെ ഇഷ്ടജനങ്ങള്‍ക്കെതിരെ
ആയുധമെടുപ്പിക്കാന്‍ പോന്ന ഒരു മൌനം
അവളുംനുണയുന്നുണ്ടെന്ന്

നിന്‍റെ കഴിവുകേടുകള്‍ മറച്ചു കൊണ്ട്
അവളെ കൂടെ കൊണ്ട് നടക്കുമ്പോള്‍
നീ ഓര്‍ക്കണമായിരുന്നു
തരം കിട്ടിയാല്‍ വരം പ്രയോഗിക്കാനുള്ള ത്വര
അവള്‍ക്കുള്ളില്‍ തന്നെയുണ്ടെന്ന്

ആളി പടര്‍ന്ന കാമത്തിന്‍ ജ്വാലകള്‍
വാണിജ്യത്തെരുവില്‍ പോയ്‌
അണയ്ക്കുമ്പോള്‍
നീ ഓര്‍ക്കണമായിരുന്നു
നിനക്കുവേണ്ടി ഒരു നഗരത്തെക്കൂടി
എരിക്കാന്‍ പോന്നവള്‍ വീട്ടിലുണ്ടെന്ന്

3 comments:

  1. വരികള്‍ , ആശയം എല്ലാം ശക്തം..തീഷ്ണം

    ReplyDelete
  2. ഓര്‍മ്മ വേണം!

    ReplyDelete
  3. ഓർമ്മകളുണ്ടായിരിക്കണം.

    നല്ല കവിത

    ശുഭാശംസകൾ....

    ReplyDelete